Yma yn D2 Propco rydym yn ymfalchïo mewn cynnig tai o safon i'r rhai mewn angen.

Datganiad o Ddiben – Cyflwyniad

Mae D2 Propco yn gwmni o Gaerdydd yn Ne Cymru. Fe’i sefydlwyd yn 2017 trwy brynu ac adnewyddu eiddo i safon uchel, gyda’r nod o ddarparu lle diogel i oedolion a phobl ifanc sy’n agored i niwed i fyw ynddo. Rydym yn sefydliad sydd wedi hen ennill ei blwyf gydag eiddo yng Nghaerffili, Caerdydd, Merthyr Tudful, Casnewydd, Rhondda Cynon Taf, Abertawe, Pen-y-bont ar Ogwr a Thorfaen. Rydym wedi meithrin perthynas ardderchog gyda'r Cynghorau a'u staff yn y meysydd hyn.

Yn D2 Propco rydym yn ymfalchïo mewn cynnig tai diogel o ansawdd uchel i’r rhai mewn angen, gan osgoi defnyddio llety gwely a brecwast drud, amhersonol ac anymarferol. Rydym yn darparu cymorth llety brys a dros dro ar draws De Cymru, gan osgoi’r defnydd o wely a brecwast a dileu’r angen i bobl gysgu allan. Nid ydym yn ddarparwyr gofal. Rydym yn rhan o fecanwaith cymorth ehangach. Gall ein rheolwyr tai hynod brofiadol, os oes angen, gysylltu'n agos â gweithwyr cymdeithasol, rhoddwyr gofal ac awdurdodau lleol i sicrhau bod pobl agored i niwed yn teimlo'n ddiogel, wedi'u galluogi a'u harwain yn ystod eu hamser yn ein llety. Ein nod yw gwneud hyn trwy ddarparu amgylchedd diogel, sefydlog a strwythuredig, gyda ffiniau clir ar gyfer hyd arhosiad y person.